A sección quinta da Audiencia de Pontevedra acollerá a próxima semana o xuízo contra P.M.A.C., acusado de simular ser o administrador único dunha entidade de banca electrónica que resultou ficticia para estafar 57.117 euros a tres clientes pola hipotética concesión de senllos créditos. Segundo recolle o escrito da Fiscalía, o acusado convenceu ao xerente dunha sociedade de investimentos de que xestionaba a entidade de banca electrónica Usea Bank Ltd. Europe para contactar con dous clientes daquel e ofrecerlles senllos préstamos por valor de 300.000 e 4,5 millóns de euros.
Destes dous clientes, así como do xerente da citada sociedade de investimentos, recibiu diversas cantidades de diñeiro en concepto de seguro de devolución do crédito que supostamente lles ía a conceder. Ningún deles recibiu o crédito prometido nin o diñeiro que anticiparon.
O fiscal cualifica os feitos como constitutivos dun delito continuado de estafa agravada e solicita para P.M.A.C. a pena de catro anos e medio de cárcere e unha multa de 3.300 euros, así como indemnizar ás súas supostas vítimas coas cantidades estafadas.
