A Xunta Electoral Central (JEC) estimou parcialmente unha denuncia de En Marea que apunta á Xunta "por difundir desde a páxina web e redes sociais institucionais unha campaña de logros e proxectos" estando convocadas as eleccións xerais do 28 de abril. A partir de aí, ordena a súa retirada, "sen que sexa necesaria a adopción de medidas sancionadoras adicionais".
En Marea presentou a pasada semana unha denuncia ante a JEC contra a Xunta por divulgación "de propaganda indebida en época preelectoral". En concreto, o partido instrumental entende que a publicación da campaña 'Xuntos estamos construíndo a mellor Galicia para visitar, que é tamén a mellor para vivir' na web do Goberno galego, enxalza "logros e proxectos" en materia turística e constitúe por iso un incumprimento da regulación en período de campaña.
Ante a denuncia, a JEC recorda que a lei electoral "impide que desde a convocatoria dunhas eleccións e ata a celebración das mesmas os poderes públicos poidan organizar ou financiar, directa ou indirectamente, actos que conteñan alusións ás realizacións ou aos logros obtidos".
Ante unha segunda denuncia, a Xunta Electoral Central apunta aos mesmos preceptos para determinar que debe "entenderse incluída" na prohibición "a publicación na conta que a Consellería de Facenda ten na rede social de Twiter, así como na súa páxina web institucional, de afirmacións con connotacións valorativas de contido electoralista, relacionadas coa noticia de que Galicia pechou 2018 con superávit contable; a título de exemplo".
