O Consello da Xunta deu este xoves luz verde a unha modificación no regulamento da Lei do Solo que permitirá, entre outros aspectos, facilitar a construción de novas vivendas ou a rehabilitación das existentes en chan rústico, especialmente cando estean vinculadas a instalacións agropecuarias. Desta forma, foméntase a substitución xeracional no sector primario e avánzase na estratexia para rexuvenecer e dinamizar o campo. Un obxectivo que tamén se buscará a través doutra vía que abre o cambio legal: o fomento de negocios rurais.
Desde a súa entrada en vigor hai tres anos, a Lei do Solo evidenciou algunhas lagoas e dificultades de interpretación que provocaron inseguridade, sobre todo relacionada coa vivenda en zona rústica.
O novo marco xurídico permitirá, nas explotacións agropecuarias, habilitar unha segunda casa asociada á que xestiona a granxa. Nunha sociedade tradicional como a galega resulta especialmente interesante, xa que abre a porta á substitución xeracional no sector primario, porque os mozos poderán manter o negocio dos seus pais, pero "independizados" na súa propia vivenda. O cambio legal incluso abre a porta a ese segundo inmoble na explotación non só para familiares, senón para persoas que exerzan como vixiantes, xestores ou asistentes das explotacións.
Ademais, autoriza edificar casas para jornaleros temporais cando o ciclo de produtos así o esixa —a vendima dura dous meses, a campaña do arándano medio ano, a castaña todo o outono...—. Fóra desas datas, esa vivenda poderá destinarse a outros usos, como o aluguer vacacional.
Seguindo a mesma estratexia para dinamizar o rural, potenciarase o turismo en chan rústico, especialmente o relacionado cos camiños de Santiago. Desta forma, concrétase o concepto de albergues turísticos vinculados ás rutas, consideración que se dará a aqueles emprazados en ámbitos con declaración BIC ou en zonas de afectación do Camiño.
O terceiro eixo será a rehabilitación das construcións rurais existentes para recuperar a riqueza do patrimonio do campo. O presidente da Xunta aclarou que se poderá desenvolver máis dun uso neses inmobles, unha ampliación que permitirá "compatibilizar" as residencias con negocios "típicos do rural".
Para rematar, introducirase unha serie de cambios a nivel administrativo e de planificación urbanística para clarificar o novo Plan Básico Autonómico.
MÁS RISGA. O Consello tamén aprobou o decreto que desenvolve a lei de inclusión, que permitirá que as persoas que cobran a Renda de Integración Social de Galicia (Risga) —unhas 10.000— poidan compatibilizar esa prestación cun traballo. Trátase dunha normativa moi complexa que acumula anos de atraso desde o seu anuncio, tanto polos rigores da crise económica como polo debate sobre a súa aplicación práctica.
O decreto prevé crear dous novos tramos da Risga: un de inserción e outro de transición ao emprego. No primeiro, os beneficiarios poderán recibir ata 188 euros adicionais durante un máximo de 12 meses, con prórroga doutros seis, a condición de que teñan un diagnóstico de empleabilidad e co compromiso de incorporarse a un traballo se xorde ou a un curso de formación. O segundo tramo permitirá cobrar un máximo dun 35% máis do salario mínimo máis a Risga durante o primeiro mes, unha cantidade que irá descendendo paulatinamente ata deixar de percibila aos seis meses.
O decreto tamén prevé que os venezolanos que cheguen a Galicia cobren unha Risga.
Ademais, a Xunta aprobou este xoves a renovación do bono eléctrico galego para as familias "máis vulnerables", unhas 14.000.
