O Goberno galego deu luz verde ao primeiro regulamento do taxi na comunidade, debatido con profesionais do sector e consumidores, e que introduce varias novidades, por exemplo simplificar a concesión de licenzas –cun só trámite– e tamén "legalizar", por exemplo, o servizo compartido por varios usuarios.
Diso informou o presidente da Xunta, Alberto Núñez Feijóo, na rolda de prensa posterior á reunión semanal do seu Executivo, na que incidiu en que o uso do servizo compartido ata agora non estaba "expresamente regulado", o que podía ocasionar problemas. Agora dáse este paso, o que "abaratará" o custo.
No marco da planificación do transporte público, tamén queda regulada a posibilidade de que, en determinadas zonas con dificultades para o transporte escolar polo baixo número de usuarios, agora a Xunta poida "contratar a un taxi que leve a dous ou tres alumnos ao colexio", o que supón "unha boa formulación para os pais e para o taxista".
Entre outras novidades, tamén se regulan os dereitos do usuario --que poderá decidir, por exemplo, sobre o aire acondicionado, a calefacción ou o volume da radio--.
Así mesmo, tras a polémica ao redor dos vehículos con VTC, o presidente galego reivindicou "un marco regulatorio" global para este servizo, pero avanzou que a Xunta actuará "dentro das súas escasas competencias" e obrigará a todos os vehículos que presten este servizo VTC a levar un distintivo que o indique nun lugar visible.
