A Xunta nega problemas no sistema de autorizacións para viaxar a Cíes
Esta fin de semana unhas 300 persoas quedaron en terra a pesar de que se lles concedera o permiso
A directora xeral de Patrimonio Natural, Ana María Díaz, negou este luns problemas no sistema de autorizacións para viaxar ás Illas Cíes despois de que esta fin de semana unhas 300 persoas quedasen en terra a pesar de que lles foi concedida a mesma.
Díaz explicou que a cuestión foi que unha navieira, Mar de Ons, xestionou a solicitude de autorizacións para asociacións de veciños de Vigo e un colexio de Vilagarcía o 2 de xuño e non foi ata once días máis tarde que foi a sacar os billetes, e xa entón se superara a cota diaria de 2.000 visitantes.
Recalcou que para ir ás Cíes débense cumprir dous requisitos: a autorización previa e a compra do billete ás navieiras autorizadas, no prazo de dúas horas a partir do próximo 1 de xullo.
Díaz detallou que, tal e como demandaban as propias navieras, as autorizacións expedidas non se limitan á cota de 2.000 visitantes diarios, porque por exemplo na pasada Semana Santa déronse 1.500, pero acabaron viaxando apenas 200 persoas.
Recalcou que a cota, que é "sacro" para a Xunta, que non quere que se reproduzan os "desagradables episodios" de agosto de 2017, márcano os 2.000 billetes "efectivos".
Díaz significou que o sistema de autorizacións "funciona sen ningún tipo de problemas", sen menoscabo de pedir "as desculpas que correspondan" polo sucedido esta fin de semana.
O alcalde de Vigo, Abel Caballero, criticou que a Xunta volva facelo rematadamente mal coas Cíes" ao ser "incapaz de cumprir as súas propias normas", dixo.
Caballero esixiu á administración galega "garantías" de que non se volva a pasar a cota diaria de autorizacións e que sexa "máis eficiente".
Por mor desta incidencia, o rexedor vigués preguntouse como desde a Xunta van promover unha candidatura, a de Cíes-Illas Atlánticas, para patrimonio da humanidade, "se son unha calamidade".
Caballero salientou que desde que presentou a súa candidatura, a Xunta non impulsou "ningunha" actividade para desenvolvela, o que, segundo cre, "pon de manifesto que só pretendían bloquear" a impulsada por Vigo porque, en definitiva, o seu presidente, Alberto Núñez Feijóo, "non quere que Cíes sexa patrimonio".