A Xunta de Galicia creará unha plataforma informática na que rexistrará toda a información relativa aos núcleos rurais abandonados co obxectivo de facilitar a súa recuperación. A ferramenta funcionará a modo de escaparate ou catálogo de aldeas sen poboación, preto de 4.000 en Galicia, co obxectivo de facilitar a súa venda ou aluguer sempre que os propietarios así o desexen.
A iniciativa, impulsada pola Consellería de Medio Ambiente, Territorio e Vivenda, recibiu este mércores luz verde no Consello da Xunta, un primeiro paso para que poida empezar a operar en xaneiro.
A plataforma dixital incluirá a descrición do inmoble e a súa localización, así como a súa referencia catastral, a situación urbanística, a superficie e o prezo de venda ou aluguer —así como a súa modalidade—. Ademais, poderanse achegar fotografías e información complementaria como dependencias anexas o sistema enerxético.
► Máis información: Galicia ten máis de 1.800 aldeas deshabitadas
Segundo os datos do Instituto Nacional de Estadística (Ine), Galicia contabilizaba en xaneiro de 2019 unhas 3.900 entidades de poboación rural abandonadas, das que 1.889 son núcleos con polo menos dez vivendas ou, se teñen menos, albergaron no seu día a máis de 50 habitantes. Estes son os núcleos convencionais e que poden resultar atractivos como investimento conxunto para a súa explotación turística, como xa hai algún exemplo en Galicia.
A maiores, existen outras 2.011 chamadas entidades dispersas, con características que non permiten cualificalas como núcleos de poboación pero que tamén poden poñerse no mercado para a súa venda e rehabilitación.
A nova plataforma buscará, precisamente, facilitar ese contacto entre os vendedores e aqueles interesados en investir en vivendas do rural. Esta ferramenta está contemplada na Lei de Rehabilitación de 2019, que obriga aos propietarios a conservar e rehabilitar os inmobles, pero que tamén facilita a intervención pública para iso, como ocorre no caso desta plataforma.
A Xunta invitará a Federación Galega de Municipios e Provincias (Fegamp) e ao Colexio de Axentes da Propiedade Inmobiliaria a colaborar na medida, coa que se pretende recuperar e dinamizar o rural, segundo explicou Alberto Núñez Feijóo tras o Consello.
