AS FAMILIAS galegas encararán o cambio de década con máis alegría nos seus petos ao dispor de novas axudas públicas e menos presión fiscal, receita clásica que a Xunta leva aplicando xa varios exercicios con bos resultados: 1.100 millóns de aforro nas economías domésticas desde 2009. Con ela, pretende minimizar o impacto "demoledor" que terán nos fogares o dieselazo e outros impostos impulsados polo Executivo de Pedro Sánchez, convertido este martes xunto a Cataluña no inimigo dos intereses da comunidade e en exemplo de inestabilidade, debilidade e improvisación política.
Fronte a eles, Alberto Núñez Feijóo debuxou este martes no debate do estado da autonomía unha Galicia "estable". E a mellor proba é a aprobación, este mércores no Consello, do teito de gasto de 2019, paso previo a que a Xunta dispoña de orzamentos "no prazo legal". E será precisamente neses Orzamentos nos que se sustancien as novas rebaixas fiscais das que gozarán os galegos.
De arranque, Feijóo só deslizou unha: menos impostos para comprar vivenda usada para residencia habitual, ata o punto de que mozos, familias numerosas e discapacitados serán os que menos paguen neste concepto en toda España. Tamén garantiu que "se manterán todos os beneficios fiscais que estean en vigor".
A recuperación económica tamén permitirá consolidar os dereitos dos empregados públicos e incluso adquirir novos privilexios a través da carreira profesional. E as melloras en materia laboral non quedarán no funcionariado, xa que Feijóo pretende reabrir o diálogo social cos sindicatos, unha idea que reforzará con diversas propostas para atraer empresas e investimentos e impulsar a formación. O obxectivo non cambiou: pechar a lexislatura con polo menos 80.000 empregados máis.
POLÍTICA SOCIAL. A economía foi o máis reseñable dun debate de política xeral no que, esta vez si, Feijóo fuxiu do modelo clásico dos grandes anuncios estelares para cambialo por unha batería de medio centenar de propostas menos pomposas pero máis realistas. E boa parte delas teñen que ver coa política social e, particularmente, coa demografía e a conciliación, a única materia que quedou pendente da súa folla de ruta 2015-2020, en palabras de Feijóo. Precisamente, o líder popular xa avanzou que presentará un novo plan estratéxico 2021-2027, no que a sangría poboacional ocupará un papel central.
De momento, a curto prazo, Galicia disporá en 2019 da primeira lei de impulso demográfico de Europa e seguirá apostando polo retorno de emigrantes. Pero a vía pola que pretende repoboar Galicia a Xunta será a da conciliación, animando ás empresas a aplicar horarios máis flexibles. O plan de conciliación da Xunta tamén chegará ao ámbito municipal e non só se manterán todas as axudas para o coidado de fillos senón que algunhas, como o Bono Coidado, ampliaranse, para que non só inclúan garderías senón tamén as ludotecas.
O xiro social da Xunta que puxo fin a anos de austeridade terá continuidade tamén coas liñas de axudas aos máis necesitados ou á dependencia: máis Risga e máis subvencións para o coidado de maiores, que indirectamente tamén ten repercusión na conciliación familiar.
As políticas sociais complétanse cunha liña continuista en educación e sanidade: no primeiro caso profundando na FP e a dixitalización e no segundo, coa atención aos maiores a través dunha nova estratexia para enfermos crónicos.
XACOBEO. Era un segredo a voces que o Xacobeo ocuparía un lugar destacado no discurso de Feijóo. O presidente pediu "entender" a cita como "unha oportunidade histórica" para Galicia, como o foi a Expo para Sevilla ou os Xogos Olímpicos para Barcelona, polo que reclamou deseñalo "entre todos": os políticos a través dun grupo de traballo específico e a sociedade a través da plataforma O teu Xacobeo.
Máis aló destes asuntos, Feijóo deslizou certa continuidade en materia de transporte, igualdade, rural e infraestruturas, estas últimas —cinguidas ao Ave— quizais as grandes esquecidas do debate de 2019 en detrimento do medio ambiente, unha área que acaba de cambiar de conselleira e que deixou anuncios relevantes. Así, Feijóo insistiu no crecemento ordenado de Galicia a través de varias leis e avanzou unha nova política hídrica e de residuos que permitirá aos cidadáns aforrar nos recibos do lixo e a auga.
POLÍTICA. Pero o debate tamén deixou tempo para a política pura e dura. Neste sentido, Alberto Núñez Feijóo fixo un chamamento á necesidade de convocar a Conferencia de Presidentes para abordar o financiamento autonómico. "Non se pode pór a escusa de Cataluña para non abrir" un debate que ve "imprescindible".
Tamén pechou a porta a unha reforma constitucional se ten como único fin "contentar" ao independentismo catalán, aínda que non para outros fins como unha posible reforma do Senado. E unha e outra vez foi taxativo co agravio e o ataque que suporía privilexiar a unhas comunidades fronte a outras. Porque se se ataca ao Estado Galicia forma parte del "e os dereitos dos galegos están sendo igualmente agredidos". "É hora de dicir que non poden pagar xustos por pecadores", resolveu un Feijóo especialmente belixerante co caso catalán.
A nivel doméstico, o do PPdeG usou as súas dúas quendas de réplica para desmontar as acusacións da oposición, especialmente duras ao abordar os recortes en sanidade ou a política contra o lume. Pero fronte á visión apocalíptica de En Marea, PSdeG e BNG, Feijóo defendeu a súa xestión, falou dunha Galicia "mellor" que a que herdou en 2009 e que aínda irá a máis en 2020. E tendeu a man ao diálogo e ao "consenso", cunha chiscadela especial cara aos socialistas e cos seus peores reproches cara a un Luís Villares co que acabou especialmente encabuxado.
