Operado o deputado do PP que sufriu un infarto en Miami
Molinero, deputado por Albacete, estaba en Miami como membro da delegación do Congreso e do Senado para asistir á fase oral do novo xuízo de Pablo Ibar
O deputado popular Francisco Molinero, que sufriu o mércores un infarto en Miami, foi intervido nun hospital desta cidade estadounidense e atópase en observación na UCI, pero "aínda non está consciente", informou a secretaria xeral do PP albaceteño, Cesárea Arnedo.
"Parece que todo saíu moi ben, pero aínda non poden valorar os posibles danos", engadiu Arnedo, quen agregou que aínda é pronto.
Indicou ademais que é a presidenta do Congreso, Ana Pastor, quen ten á corrente ao partido través dos presidentes do PP en Castela-A Mancha, Paco Núñez, e en Albacete, Vicente Aroca.
Un familiar de Molinero, deputado por Albacete, que estaba en Miami como membro da delegación do Congreso e do Senado que asistía ao comezo da fase oral do novo xuízo de Pablo Ibar, voa xa cara a Estados Unidos para estar con el.
O deputado sufriu unha parada cardíaca cando se preparaba para volver a España co resto da delegación parlamentaria.
"Se ocorrese no voo de volta sería fatídico" para Molinero, aínda que afortunadamente "foi atendido inmediatamente", e agora estase "á espera da recuperación, segue na UCI, aínda non está consciente, recuperándose da operación", dixo.