A aeroliña irlandesa Ryanair confirmou este luns que comunicou á Policía británica a existencia dun incidente supostamente racista ocorrido o pasado venres nun voo entre os aeroportos de Barcelona (nordés español) e Londres Stansted.
A compañía de baixo custo indicou na súa conta de Twitter que "coñece a existencia" dun vídeo do incidente gravado por un pasaxeiro a bordo do avión e que o puxo en coñecemento da Policía do condado de Essex, ao sueste do Reino Unido.
O clip en cuestión difundiuse amplamente nas redes sociais e causou polémica non só polo abuso verbal en inglés que un pasaxeiro dirixe a unha muller de raza negra que está sentada na súa fila, senón tamén pola reacción da tripulación de cabina.
No vídeo escóitase como os auxiliares de voo de Ryanair lle piden ao presunto agresor que non sexa "groseiro" e que se acougue, mentres que outros pasaxeiros avogan por que o expulsen inmediatamente do aparello que operaba o voo FR015.
A pesar de que o pasaxeiro chamou á muller "fea negra cabrona", "fea vaca estúpida" e díxolle que non lle falase "nunha lingua estranxeira", este permaneceu no avión, o que xerou indignación nas redes sociais e críticas cara a Ryanair.
"Reportamos isto á policía de Essex e isto é agora un asunto policial, non podemos facer máis comentarios", sinalou a aeroliña nunha nota, mentres se aclaran os feitos.
Segundo o diario Irish Times, todo comezou cando a muller, de 77 anos, non puido moverse rapidamente do seu asento de corredor para deixar pasar ao home para que ocupase o seu xunto ao portelo.
O pasaxeiro se inquedouse, apuntou ese medio, e comezou a gritala, mentres a filla da muller, situada noutro asento explícalle que a súa nai ten problemas de mobilidade. "Non me importa se é unha puta discapacitada ou non, se lle digo que se aparte tense que apartar", advertiu o pasaxeiro no vídeo, xa sentado no seu asento, desde onde continuou enfrontándose á súa compañeira de fila.
Nas imaxes, tamén se escoita á muller dicirlle ao home que "apesta" e que "necesita lavarse", antes de pedir á tripulación que a cambie de sitio para poder sentar xunto á súa filla.
