Acepta 20 anos de cárcere a banda albanesa que asaltou máis de 30 casas no sur de Pontevedra

Catro homes de nacionalidade albanesa acusados de formar unha banda á que se lles atribúen 31 roubos en vivendas en Nigrán, Gondomar, Baiona e Redondela entre xullo e outubro de 2015, recoñeceron os feitos e aceptaron penas de cárcere que suman os 20 anos.

Son dez anos menos que os que pedía en principio o fiscal, aínda que a sentenza de conformidade, ditada este mércores in voce na sección quinta da Audiencia de Pontevedra, recolle que os primeiros 18 meses os cumprirán en España e logo procederase á súa expulsión do país, ao que non poderán regresar nun decenio.

Na fixación da pena tívose en conta a atenuante de reparación do dano, ao consignar 19.700 euros dos máis de 66.000 euros que deberán afrontar en concepto de responsabilidade civil.

Segundo o escrito da Fiscalía, os individuos identificados coas iniciais T.M., M.M., A.M. e B.D., xunto con P.H., quen non puido ser localizado e está en busca e captura, levaron a cabo unha serie de roubos en vivendas habitadas na comarca do Val Miñor entre xullo e outubro de 2015.

Para acceder ás vivendas forzaban portas e fiestras con desaparafusadores e, unha vez dentro, subtraían todos os obxectos de valor ao alcance, principalmente xoias, reloxos e diñeiro en efectivo.