Nova xornada de choivas persistentes en Galicia

Este mércores Galicia continuará baixo a influencia das baixas presións e con entrada de aire frío en altura, o que traerá moita inestabilidade. A Axencia Estatal de Meteoroloxía (Aemet) prevé para este mércores precipitacións persistentes na comunidade, sen descartar que os chuvascos sexan puntualmente fortes e que vaian acompañados de tormentas ocasionais con saraiba e aparello eléctrico. As temperaturas, iso si, manteranse estables, con xeadas débiles nas montañas de Ourense.

A cota de neve —de 1.600 a 1.800 metros— irá diminuíndo ao longo do día ata acabar nos 1.000/1.200 ao final da xornada.

Os ventos soprarán de oeste pola mañá, noroeste a partir do mediodía, con intervalos fortes no litoral e zonas altas do interior.

Segundo Meteogalicia, os termómetros non baixarán dos 8 graos nas grandes cidades galegas. É a temperatura mínima prevista para Lugo e Ourense, mentres que en Pontevedra non caerán por baixo de 10. En canto ás máximas, en Vigo e Ourense chegarase aos 16 graos, pero na cidade da muralla non se superarán os 14 e na Boa Vila os 15.