Un incendio afectou a unha palleira de Santiso
18 de agosto de 2016 (12:09 h.)
Un lume calcinou por completo unha palleira que almacenaba diverso material agrícola, madeiras e palla, na localidade coruñesa de Santiso, informou a central que se ocupa de coordinar a atención ás urxencias en Galicia.
Os particulares que chamaron ao CAE 112 Galicia para pedir axuda indicaron que ardía un cuberto pegado a unha casa no que se almacenaban distintos apeiros de labranza.
De inmediato, o CAE 112 Galicia pasou aviso aos Bombeiros de Arzúa e á Garda Civil.
Debido á magnitude das chamas, foi necesaria a intervención dos efectivos de Protección Civil de Melide que, xunto cos bombeiros, sufocáronas.
Ao redor das 07:00 horas desta mañá, os membros do parque comarcal deron por finalizadas as tarefas de extinción.