Asia Argento é despedida de 'Factor X' Italia tras as acusacións de abuso

A actriz e directora italiana Asia Argento, acusada polo músico de rock e actor Jimmy Bennett de presunto abuso sexual cando este era menor, foi despedida como xurado do concurso musical Factor X en Italia, informaron este luns os medios italianos.

Os responsables do programa publicaran hai días un comunicado no que aseguraban que "se se confirma o publicado por The New York Times, esta situación sería totalmente incompatible cos principios éticos e os valores" da cadea Sky.

Agora, o programa prescindirá de Argento, unha das pioneiras do movemento #MeToo, para a súa próxima edición que comeza o 6 de decembro.

A decisión prodúcese despois de que Argento se vise envolvida nun escándalo por presunto abuso sexual cometido contra Bennett, cando ela tiña 37 anos e el 17.

A noticia transcendeu grazas a unha información do xornal The New York Times, que asegurou que Argento chegou a un arranxo extraxudicial con Bennet, co que acordou pagar 380.000 dólares para frear as acusacións na súa contra.

A actriz negou "categoricamente" estas acusacións e asegurou que está "profundamente conmocionada e ferida" polas noticias "absolutamente falsas" que circularon sobre ela.

O encontro entre ambos se coñeceron nunha película na que ela fixo da súa nai—, ocorrería en 2013 no hotel Marina del Rey en California (EE UU), onde a idade de consentimento legal para relacións sexuais é de 18 anos.