Sete persoas, que ingresaron en prisión, foron detidas en Vigo como presuntas autoras de varios roubos con forza e pertenza a un grupo itinerante especializado no roubo de vivendas sempre tras violentar a porta principal, apoderándose principalmente en todos os casos de diñeiro e xoias.
A investigación, informa a Policía nun comunicado, comezou neste mes de agosto. Os axentes detectaron a presenza en Galicia dun destacado membro dunha organización criminal dedicada aos roubos en vivendas, e comezaron as pescudas para a súa plena localización.
Tras varias xestións púidose comprobar que o investigado, encartado en numerosos roubos por toda a xeografía nacional, estaba acompañado doutras seis persoas e que se atopaban hospedados en diferentes establecementos hostaleiros de Vigo.
Os axentes intensificaron deste xeito as vixilancias sobre o grupo e púidose constatar a súa ilícita actividade e a súa estrutura criminal, comprobando que alternaban as funcións de execución e de vixilancia entre os seus sete compoñentes indistintamente.
Os arrestados actuaban durante o día, aproveitando a ausencia dos moradores nos inmobles, e utilizaban dous vehículos para os seus desprazamentos.
á hora de cometer os roubos, sinala a nota, violentaban a porta principal con palanquetas, "picos de papagaio" ou desaparafusadores de grandes dimensións.
Os axentes tamén detectaron que utilizaban o método do "escalo", accedendo ás vivendas polas portas ou vivendas das terrazas.
Unha vez no interior actuaban con gran rapidez e seguridade, rexistrando os domicilios en poucos minutos e apoderándose principalmente de diñeiro e xoias.
Tras analizar todos os datos obtidos durante a investigación, os axentes estableceron o correspondente dispositivo e procederon ao arresto dos sete integrantes do grupo criminal.
No rexistro dos dous vehículos interviñéronse varias xoias, máis de tres mil euros en efectivo e diversas ferramentas utilizadas para violentar as portas.
Os policías puideron demostrar que varios dos efectos recuperados proceden de tres roubos cometidos na zona.
