O Parlamento de Galicia aprobou este martes, cos votos a favor de todos os grupos, salvo os do BNG que se situou en contra; o ditame da Comisión Permanente non Lexislativa para as Relacións co Consello de Contas polo cal queda aprobada de forma definitiva a conta xeral da Comunidade autónoma correspondente ao ano 2015.
Este ditame foi elaborado a partir dos informes de fiscalización das contas do sector público de Galicia contidos na memoria de actividades de Contas correspondentes a 2016 e á súa aprobación sumouse a de doce propostas de resolución dirixidas a encamiñar a acción da Xunta: once efectuadas polo PPdeG e unha polo PSdeG, a única das 47 presentadas pola oposición que saíu adiante.
O presidente da comisión, o deputado do PPdeG Daniel Varela Suanzes-Carpegna, procedeu na sesión plenaria deste martes a ler o contido destas iniciativas, que inclúen medidas tales como que o Goberno galego continúe dando cumprimento ás recomendacións de Contas ou siga sendo "unha das Comunidades autónomas con maior esforzo investidor", á vez que reducindo a súa débeda.
A proposta socialista insta á Administración autonómica a elaborar un plan de traballo ata 2020 para facilitar a participación das pemes na contratación pública, mentres que o resto de contidos do PPdeG aborda melloras en materia de transparencia ou de xestión administrativa.
A representante dos populares galegos neste debate, a parlamentaria Cristina Romero, defendeu que as 46 propostas restantes da oposición non foron aceptadas porque, na maioría de casos, están "repetidas do anterior debate" e censurou o uso como "arma de desgaste" contra o Goberno dos informes do Consello de Contas, sobre todo cando arroxan datos positivos.
Con todo, Manuel Lago, de En Marea, replicou que actitudes como a mostrada polo PPdeG son "a proba de que a maioría absoluta en mans dun partido con escasa cultura democrática transfórmase" nunha "apisoadora" que deriva nunha "democracia de baixa intensidade" na que se acala a voz da oposición.
Do mesmo xeito, os portavoces do conxunto da oposición denunciaron que se exclúen propostas para incidir na loita contra a corrupción, para seguir o cumprimento das recomendacións de Contas, para mellorar a política orzamentaria do Goberno galego ou para avaliar as entidades instrumentais.
A continuación, o pleno do Parlamento galego acometeu o debate da toma en consideración dun texto lexislativo do grupo de En Marea para derrogar a lei de medidas temporais en determinadas materia de emprego público de Galicia, que tamén foi rexeitado cos votos do grupo maioritario do PPdeG a pesar de ser apoiado por toda a oposición.
A representante de En Marea, Eva Solla, sinalou que esta norma incluía unha disposición para a súa revisión ao cabo dun período de tempo que non foi levada a cabo e lamentou que a Xunta fixese pagar aos traballadores as consecuencias dos seus recortes mentres os primeiros en recuperar os seus soldos foron os membros do Goberno galego.
Na súa intervención, Solla tachou de "vergoñoso" este feito e reclamou que se derrogue a lei en cuestión para devolver "un pouco de dignidade" ao emprego público na autonomía.
Pola súa banda, o PPdeG xustificou o seu rexeitamento á proposta por entender —expresou o deputado Jacobo Moreira— que xa se devolveu parte das pagas extra detraídas e volveuse a abonar este complemento con normalidade, polo que rexeitou "apoiar unha derrogación que, desde logo, Galicia non comparte".
Do mesmo xeito, criticou a posición "mutante" de En Marea neste tema, posto que primeiro pedían a derrogación "íntegra" desta lei, mentres que agora engaden disposicións para manter determinados puntos da mesma.
Durante a exposición de motivos de Moreira, un grupo de empregados públicos que seguía o debate desde a bancada do hemiciclo foi expulsado da Cámara tras mostrar uns carteis nos que se podía ler a seguinte lema: "Feijóo, devólvenos o roubado".
En representación dos mesmos atendeu aos medios o sindicalista Emilio Doforno, que en declaracións nos corredores do Parlamento manifestou que a lei de 2012 foi no seu día "un dos maiores ataques" aos empregados públicos en Galicia e que a Xunta aínda ten pendente unha débeda de 3.000 euros de media por cada traballador.
