Nun 2022 no que a reactivación da economía global tras o covid e a crise enerxética derivada da guerra de Ucraína espolearon os prezos de tal xeito que a vida se encareceu un 8,4% de media, os soldos incrementáronse aínda que en menor proporción, o que derivou nunha perda de poder adquisitivo. Segundo a análise realizada polo Instituto Nacional de Estadística (Ine) dos datos da enquisa de poboación activa (Epa), a retribución media bruta bateu por primeira vez os 2.000 euros ao situarse en 2.056,47 en Galicia tras incrementarse un 3,1% respecto de 2021. Aínda que a mellora foi máis intensa que a rexistrada no conxunto do Estado, onde este indicador creceu un 2%, o certo é que a media galega segue por baixo (-3,4%) da referencia española, de 2.128,37 euros.
O ano pasado, a comunidade foi a oitava co soldo máis contido. De media, un galego cobrou un 11,4% máis que un estremeño —os peor situados—, aínda que a brecha con respecto aos mellor remunerados, os vascos, ensanchouse na última década. Hoxe un galego percibe un 19,2% menos que un asalariado fincado en strong<> Euskadi. Uns 5.872 euros menos ao ano.
Na súa detallada análise, o Ine clasifica aos traballadores en función da contía do seu soldo en dez grupos. Este exercicio revela que o 31,6% dos asalariados ingresaron o ano pasado menos de 1.440,1 euros brutos en 12 pagas ao formar parte dos tres primeiros deciles. Descontadas as retencións do IRPF e as cotizacións, quedarían uns 1.200 netos. En total, 284.300 traballadores non chegan a esa referencia.
Uns 234.400 asalariados galegos cobran de 2.373,7 euros para arriba. Son o 26,1%do total
Na parte alta da clasificación, un 26,1%, isto é, uns 234.400 profesionais, cobran de 2.373,7 euros para arriba. Así as cousas, catro de cada dez empregados (42,4%) sitúanse nunha pinza intermedia, con ingresos entre 1.440,1 e 2.373,7 euros.
A nivel estatal, a radiografía do Ine permite comprobar que a brecha de xénero persiste: elas percibiron un 15,7% menos que eles en 2022: 1.941,7 euros ao mes, fronte aos 2.303,5 dos homes. Seis de cada dez asalariados que se atopan no tramo retributivo baixo —non chegan a 1.440,1 euros— son mulleres.
