O monte galego segue sendo un 'banco' para miles de familias que recorren á venda de madeira para reforzar as súas rendas. é especial para moitos xubilados que atopan nos seus terreos un complemento ás súas pensións. Hai un dato que o constata: ao redor da metade das persoas que solicitan curtas de madeira en Galicia son cidadáns xa retirados do mercado laboral que obteñen por esta vía un diñeiro co que completan as súas pagas -as segundas máis baixas de todo o Estado- e, en moitos casos, poden axudar aos seus fillos ou netos.
As cifras de solicitantes de aproveitamentos forestais publicadas onte polo Instituto Galego de Estatística (Ige) a partir de información da Xunta indican que o 48,6% de quen venderon madeira en 2022 eran perceptores de pensións contributivas da Seguridade Social, isto é, xubilados, cunha idade media de 74 anos. En número supoñen preto de 16.000 dun total de 32.930 residentes na comunidade que realizaron curtas ese ano, o último para o que hai datos.
O seguinte grupo con máis peso nas solicitudes de curta son traballadores, un 36,3%. En cambio, apenas un 2,2% correspondían a desempregados en 2022.
Por provincias, A Coruña foi onde máis persoas venderon madeira, concentrando o 37,2% do total, seguida de Lugo, co 23%. A continuación sitúanse Pontevedra (19,2%) e Ourense (11,9%). A orde é o mesmo se o que se ten en conta é o volume comercializado. En total, os residentes en Galicia puxeron no mercado uns 9 millóns de metros cúbicos de madeira ese ano. Pero tamén hai quen solicita aproveitamentos forestais na comunidade e vive fóra, exactamente 2.289 persoas en 2022.
Preto de medio milleiro de montes veciñais e diversas empresas tamén venderon madeira.
Cifras: máis de 600.000 donos forestais
Galicia suma máis de 600.000 propietarios forestais, que ingresaron pola venda de madeira 348 millóns en 2022. Entre os concellos con máis curtas en toda a comunidade están Foz, A Pontenova, A Fonsagrada, Palas de Rei e Lugo, segundo datos difundidos pola Federación empresarial de serradoiros e rematantes de madeira de Galicia (Fearmaga). As tallas caeron en 2023.
Valor económico
O bosque supón para a comunidade un activo valorado en preto de 43.000 millóns de euros. Unha estimación realizada por expertos do sector que toma como punto de partida a superficie arboredo que ten a comunidade: case 1,5 millóns de hectáreas.
