O diñeiro que se recade a través do futuro canon que gravará as liñas eléctricas que conectarán os parques eólicos mariños con terra a través das subestacións eléctricas destinarase en parte a dar ao sector pesqueiro unha contraprestación por ter que compartir o espazo marítimo con estas instalacións. De momento descoñécese en que consistirá esa contrapartida polo potencial impacto na actividade da flota, pero está contemplada no anteproxecto da lei autonómica que promoverá os beneficios sociais e económicos das iniciativas que supoñan un aproveitamento dos recursos naturais. Outra parte do que se ingrese a través dese canon dedicarase a labores de conservación e restauración do medio ambiente.
O texto legal, que desde este xoves e ata o 6 de xuño sométese a información pública para recibir achegas, detalla as cantidades que se cobrarán, que variarán en función do tipo de liña. Nas que vaian soterradas, serán 10.000 por quilómetro de liña de evacuación. Se son aéreas, dependerá da tensión: se é igual ou inferior a 30 quilowatts (kW), gravarase con 22.000 euros cada quilómetro; se supera os 30 e non pasa de 66 quilowatts, o promotor deberá abonar 29.200 euros; cunha tensión superior a 66 kV e non maior de 132, serán 43.000 euros. A contía ascenderá a 58.000 euros por quilómetro de liña de evacuación cando a tensión exceda os 132 kW e non supere os 220.
A recadación terá un terceiro destino: a sociedade públicoprivada que a Xunta impulsará para participar en proxectos de enerxías renovables como a eólica terrestre ou mariña, os que fagan un uso intensivo" da auga e as iniciativas mineiras ou de biogás. Esa sociedade mixta terá unha "maioría accionarial privada", algo que segundo o vicepresidente primeiro e conselleiro de Economía, Francisco Conde, permitirá "un plus de axilidade na xestión" e a participación de investidores, pero os documentos fundacionais blindarán a "posición de control" da Xunta, que poderá rexeitar proxectos que non sexan de interese público para Galicia través dun "voto cualificado".
Nas próximas semanas, o Goberno autonómico promoverá unha manifestación de interese para coñecer que empresas poden estar interesadas "e, a partir de aí, tomar unha decisión sobre as diferentes porcentaxes de participación". Non poderán ter intereses no mercado enerxético.
Outra das novidades da lei é que á hora de conceder unhas declaracións de impacto ambiental favorable ou desfavorable, avaliaranse os efectos sociais e económicos e analizaranse as medidas que propoñen os promotores para compensalos. Teranse en conta a creación de emprego, a participación de investidores locais, o reinvestimento de beneficios na zona, a preservación de bens naturais e culturais, a contratación de servizos e adquisición de produtos nese territorio ou a redución dos custos enerxéticos a familias e empresas.
Tras o Consello da Xunta, o presidente Alfonso Rueda de relevo o obxectivo da norma: "Establecer uha serie de mecanismos para que vos froitos do aproveitamento dous nosos recursos naturais revertan en Galicia".
