O Concello de Vigo respondeu á Xunta que "cumpriu escrupulosamente" coa normativa vixente tras recibir da empresa organizadora do Marisquiño o plan de autoprotección, que foi validado posteriormente polos técnicos municipais.
Así respondeu o goberno local á Administración autonómica, que este mesmo martes constatou que no rexistro oficial de plans de autoprotección da Dirección Xeral de Emerxencias "non hai constancia da inscrición do plan de seguridade correspondente" ao festival da cidade olívica, "a pesar de ser un dos requisitos legais para obter a licenza por parte do Concello de Vigo".
Neste sentido, o Consistorio confirmou que recibiu un correo electrónico o día 17 de xullo no que a organización asegura que o plan "se selaría na Xunta e pasaríase ao Porto de Vigo".
"Sorprende que, ante a notoriedade e magnitude do evento, a Xunta non tomase ningunha medida e permanecese pasiva" ao non recibir o documento, esgrimiu o goberno municipal.
Así mesmo, o Concello mostra a súa "estrañeza" ante o feito de que tanto a secretaria xeral para ou Deporte, Marta Míguez, como a directora de Turismo de Galicia, Nava Castro, acudisen á entrega de premios dunha das categorías da competición "sen verificar antes que os promotores entregasen o plan de autoprotección".
