Axentes da Policía Nacional detiveron o mércores a un veciño da localidade ourensá de Rairiz de Veiga como presunto autor dun roubo con forza no interior dun vehículo. Os feitos que motivaron a detención sucederon o pasado día 16 de novembro na Praza das Damas da cidade de Ourense, onde foi fracturado o portelo traseiro dun vehículo que se atopaba estacionado nese lugar. Do interior do vehículo foi subtraído un bolso que contiña documentación persoal, cartóns bancarios, 26 euros e dous teléfonos móbiles.
O detido é un home de 31 anos de idade veciño da localidade de Rairiz de Veiga, ao que lle constan catro arrestos anteriores por diversos feitos. Quedou en liberdade tras pasar a disposición xudicial.
