A feira do viño de Quiroga comezará este ano con música. O certame celtibérico de gaitas congregará a bandas das provincias de Lugo e Ourense, pero tamén doutras partes de Galicia e o territorio nacional. Ademais, haberá presenza internacional, como a da gaiteira iraniana Liana Sharifian e a xaponesa Mikiko Watanawa, que ofreceron no acto de presentación do evento, celebrado na Cidade da Cultura de Galicia, unha mostra do que se poderán atopar os visitantes.
O certame, organizado polo Concello de Quiroga en colaboración co de Manzaneda e a Real Banda de Gaitas da Deputación de Ourense, terá lugar o próximo 31 de marzo ás 12.00 horas. Será, do mesmo xeito que outros anos, a praza de España a que acollerá os centos de músicos que se congregarán para visibilizar a cultura e o floclore popular da comunidade, coa presenza por terceira ocasión de agrupacións infantís de gaiteiros. Nesta ocasión, o homenaxeado será Xavier Coia, mestre gaiteiro de Velle (Ourense).
Posteriormente, ás cinco da tarde, a banda de gaitas San Martiño ofrecerá un recital ao redor do recinto feiral, para logo recompensar aos asistentes con outra actuación no auditorio municipal xunto a outras agrupacións culturais. O pregón será ás oito, e correrá a cargo da xornalista Carlota Corredera, presentadora, directora e colaboradora dos programas televisivos Cámbiame e Sálvame.
