O vicepresidente da Xunta, conselleiro de Presidencia, Administracións Públicas e Xustiza, Alfonso Rueda, comparecerá no Parlamento galego o próximo martes para dar conta da proposta da Xunta ante a folga dos funcionarios da administración de xustiza en Galicia, indefinida desde o pasado 7 de febreiro.
A comparecencia prodúcese tras a petición da propia Consellería e que se acumula a outra solicitude presentada de forma conxunta por parte das formacións de oposición no Parlamento autonómico: En Marea, PSdeG e BNG.
Con todo, o PPdeG rexeitou este martes, na Xunta de Portavoces, apoiar unha declaración institucional "dentro das competencias" do Parlamento para instar á Xunta a que "deixe a soberbia" e actúe "con sensatez" para retomar as negociacións co persoal da Administración de Xustiza, pedida pola oposición.
Así mesmo, na sesión de control parlamentaria próximo mércores 7 de marzo, o presidente da Xunta, Alberto Núñez Feijóo, responderá sobre a desigualdade entre homes e mulleres en resposta ás preguntas de En Marea e do PSdeG, e sobre as iniciativas da Xunta ante as continuas "denuncias cidadás" e manifestacións que a sociedade galega, presentada polo BNG.
