As tarifas de último recurso (TUR) do gas natural, as que teñen principalmente os usuarios domésticos, baixan a partir de mañá, día 1 de abril, unha media do 3,4% con respecto ao primeiro trimestre que finaliza este sábado, cando se dispararon un 6,2%, grazas ao abaratamento da materia prima nos mercados internacionais.
As novas tarifas de último recurso do gas natural estarán en vigor desde as cero horas deste domingo, 1 de abril, segundo a resolución do pasado 22 de marzo da Dirección Xeral de Política Enerxética e Minas, que publica este sábado o Boletín Oficial do Estado (BOE).
A TUR 1, á que están acollidos fundamentalmente os clientes que usan o gas para cociñar e para auga quente e cuxo consumo non excede dos 5.000 quilowatts hora (KWh) ao ano, baixará o 2,8%.
Pola súa banda, a TUR 2, que empregan consumidores que tamén teñen calefacción de gas, farao nun 3,6%.
A tarifa TUR é unha das modalidades existentes para contratar o gas natural e o seu prezo fíxao o Goberno trimestralmente.
Está deseñada para vivendas e consumidores domésticos, e o consumo máximo para poder acollerse a ela é de 50.000 KWh ao ano, de forma que os clientes con consumos superiores deben contratar o gas no mercado libre.
En España, hai 1,8 millóns de clientes de gas natural que teñen tarifas TUR e 7,8 millóns que son fornecidos no mercado libre.
As tarifas do gas natural baixan unha media do 3,4% a partir deste domingo
Este abaratamento afectará 1,8 millóns de persoas en España
