Uns 100.000 galegos non recollen os medicamentos que lles receitan os seus médicos nin completan os seus tratamentos por non poder pagalos, segundo explicou o presidente do comité médico do Banco Farmacéutico de Galicia, Ramiro Varela.
Na presentación desta iniciativa en Pontevedra, Varela sinalou que a pobreza farmacéutica "é unha realidade" e cifrou, citando datos dun barómetro do CIS, que o 4 % da poboación deixa de tomar fármacos por motivos económicos.
O Banco Farmacéutico de Galicia, a partir de agora, axudará a galegos en risco de exclusión social a facer fronte ao copago farmacéutico e dar resposta ás súas necesidades de medicamentos e tratamentos médicos. Para este traballo, segundo os seus responsables, contactan cos servizos sociais municipais e co propio Sergas para avaliar cada situación en concreto e coñecer que pacientes non poden facer fronte ao pago dos medicamentos e necesitan a súa axuda. Unha vez analizada a súa situación, o cidadán non debe acudir a ningunha entidade colaboradora, senón que poderá dirixirse directamente á farmacia e entregaráselle directamente o medicamento sen cargo económico, ao ser adquiridos polo banco.
Ramiro Varela explicou que o "elevado" prezo do copago farmacéutico e o feito de que a sanidade pública non financie determinadas doenzas crónicas ou agudas contribúe a aumentar esta desprotección social.
A iso súmase episodios "puntuais" como o aumento no inverno da prescrición de medicamentos antigripais. Xunto a Varela, na presentación en Pontevedra desta iniciativa, participaron Ramiro Carregal e Noelia Romeu, presidente de honra e presidenta do Banco Farmacéutico de Galicia; Alfredo Garrido, presidente do Comité Farmacéutico; Rafael López López, director da iniciativa ONCOMET; e Ignacio Sánchez, vicepresidente do Colexio de Farmacéuticos. Este último lembrou que detrás da prescrición dun medicamento "existe unha necesidade", polo que defendeu que ningunha persoa que o necesite pode quedar sen poder acceder a el.