O Ano Castelao pecha chamando a elevar ao "primeiro presidente" de Galicia como "faro" en "tempos de escuridade"

Galicia puxo o broche este domingo ao Ano Castelao 2025. Foi no Panteón de Galegas e Galegos ilustres, na igrexa de San Domingos de Bonaval de Santiago, cunha ofrenda musical que, a xuízo de Miguel Anxo Seixas, presidente da Fundación Castelao, sería do gusto dun hombre que "tivo especial sensibilidade pola música".

Despois de doce meses de actos en Galicia, España e o estranxeiro para reivindicar o legado, a memoria e a vixencia dun dos grandes referentes do nacionalismo galego con motivo do 75 aniversario do seu pasamento, a Fundación Castelao –que tamén cumpre 41 anos da súa constitución– celebrou esta cerimonia para agradecer "a todas as institucións públicas e a toda a sociedade civil" o "esforzo" realizado durante este ano para homenaxear, de forma coral, con innumerables iniciativas, "a un dos maiores intelectuais e creadores que deu o noso país". Porque "Galicia, despois de Castelao, é outra cousa", recalcou Seixas sobre unha figura que "segue aí e seguirá sempre con nós".

Á ofrenda acudiron representantes dos gobernos autonómico, provincial e local, entre outras autoridades e representantes institucionais. Alí estiveron o secretario xeral de Política Lingüística da Xunta, Valentín García; o responsable de patrimonio da Deputación da Coruña, Xosé Luís Penas, ou a alcaldesa de Santiago, Goretti Sanmartín.

"Foi un ano moi importante para reivindicar a figura do galego máis importante que temos na construción da Galicia contemporánea e foi tamén un ano de moitísima unión e confluencia de distintas forzas políticas e do tecido sociocultural", declarou o alto cargo do Goberno galego aos medios antes da ofrenda.

"Castelao foi o referente que todo país precisa e que debemos ter presente no noso día a día" e unha "figura esencial" para comprender a identidade, a historia e a dimensión política de Galicia, enxalzou Penas, quen subliñou que, por tanto, os recordos e homenaxes ao rianxeiro "non se poden cinxir a só un ano". En especial, engadiu, cando "vivimos tempos de escuridade, de mentiras e de falta de referentes", os que o legado político e intelectual de personaxes como el "son un faro no medio desa néboa" e deben servir como guía colectiva para un país.

Do seu lado, a rexedora compostelá tamén expresou a súa gratitude polo "esforzo do conxunto do pobo galego para que Castelao teña presenza" na sociedade do presente. E por parte do Concello de Santiago, manifestou o seu orgulloso por que "este ano por fin sexa realidade" unha proposta que demandaba desde fai "moito tempo" como é a denominación da estación intermodal da cidade como Daniel Castelao. "Continuaremos sempre loitando pola memoria histórica", prometeu Sanmartín.

Diálogo entre a tradición e o futuro

Este colofón ao Ano Castelao contou coa actuación de "xente nova galega con talento, como quería Castelao", destacou Seixas. Tamén Penas aludiu no seu discurso ao "diálogo simbólico" establecido entre a figura do rianxeiro e a música, a través dun programa que vinculou creación universal e cultura galega e que permitiu asociar ou pensamento do intelectual cos valores de liberdade, igualdade e fraternidade presentes tanto na súa obra artística como na súa traxectoria política.

Así, o violinista Anxo Gómez Piñeiro ofreceu un recital acompañado ao piano de Haruna Takebe. O remate correu a cargo dunha cantiga da tradición galega: Foliada de Negreira, considerada unha das pezas favoritas de Castelao.

"A grandeza dun pobo mídese polo coidado, a protección e a posta en valor do que é seu: do seu patrimonio, da súa lingua e das persoas que fixeron posíbel, coa súa loita, que hoxe esteamos aquí", insistiu Penas.