Uns cincuenta colectivos feministas, agrupados na plataforma Galegas8M, esperan reunir este domingo –día 3 de marzo– en Lugo a miles "de mulleres procedentes de toda Galicia para manifestarse polas rúas da cidade baixo a lema "Por todas as mulleres, por todos vos dereitos, revolta feminista".

A portavoz deste colectivo, Ana Torrón, que este mércores comparecía en rolda de prensa en Lugo acompañada por outras integrantes do movemento feminista galego, explicou que a manifestación partirá ás 12.00 horas da chaira que hai fronte ao edificio administrativo da Xunta de Galicia, para logo percorrer diversas rúas do centro histórico e terminar na Praza Horta do Seminario.

Esa praza será "a zona cero" da protesta feminista, onde terá lugar, logo da manifestación, a lectura do manifesto a cargo da escritora María Reimóndez, no transcurso dun acto no que Ana Carreira e Cristina Lombao exercerán como "mestras de cerimonia"

Finalizada a lectura do manifesto, haberá diversas actuacións, como a que protagonizará o grupo Batuka Tabanka.

Ana Torrón asegurou que "Lugo vaise a petar literalmente" e recordou que o pasado ano, "en Vigo, concentráronse máis de 15.000 persoas".

Nestes momentos, precisou, xa está confirmado o desprazamento de 20 autobuses con todas as prazas cubertas nun total de 16 rutas por toda Galicia.

En canto á organización da manifestación, precisou que haberá tres bloques, o primeiro só para mulleres, que encabezarán a marcha; un segundo bloque "mixto", no que irá a representación de diversos colectivos e, para rematar, un terceiro no que irán os homes.

Torrón pediu aos representantes políticos que participen na manifestación que teñan "a sensibilidade" de permitir que a atención dos medios de comunicación estea centrada este día "nas mulleres" e nas súas reivindicacións.