O presidente da Federación Galega de Comercio, José María Seijas, confirmou que as vendas no comercio de proximidade reactiváronse “de xeito moderado” tras o confinamento, sen “grandes investimentos por parte dos consumidores”, que están a comprar xusto “o que necesitan”.
En declaracións a Efe, Seijas afirmou que existe entre os consumidores “un grao enorme de desconfianza” en relación co que pode suceder no futuro e “en tempos de incerteza as vendas se retraen”.
Por outra banda, no que se refire á saúde do propio sector, recoñeceu que hai comerciantes que o están pasando moi mal”, porque as “axudas non acaban de chegar” e teñen que “afrontar” pagos inmediatos, “como alugueres ou cotas de préstamos”, sen esquecer que en sectores como o “do téxtil ou o calzado” tiveron que “pagar unha mercancía” que non chegaron a vender.
En canto ás rebaixas, confía en que o comercio poida vender aínda durante un tempo o seu stock “a prezos normais”, porque “non se pode comprar a mercancía e vendela xa con rebaixas”.
Dese modo, dixo Seijas, os beneficios que obteñen os comerciantes son insuficientes para afrontar os gastos dos seus propios negocios.
Tamén precisou o presidente da Federación, en canto ás normas ditadas polas autoridades sanitarias, que agora os comerciantes “saben o que hai que facer, que traballo custoulles”, e “están a cumprir a machada”, por seguridade propia e dos seus clientes, pero tamén para transmitir “unha imaxe boa e de confianza”.
