A Sala do Civil e Penal do Tribunal Superior de Xustiza de Galicia (TSXG) confirmou a sentenza da Audiencia Provincial da Coruña contra un home por matar a outro individuo durante a celebración dun aniversario en Ferrol.
O condenado cravou unha navalla no peito ao falecido, considerando o xurado popular que non "tivera intención de matar á vítima".
O Alto Tribunal galego recordou este mércores que estes feitos mereceron unha pena de catro anos e tres meses de cárcere por delito de lesións con instrumento perigoso. Ademais, aplicóuselle un delito de homicidio por imprudencia grave, subliñou a Sala.
No fallo, indicouse que a "tramitación do presente procedemento estivo paralizada por motivo da folga indefinida" na Xustiza galega.
Deste xeito, desestimou o recurso da acusación particular e a apelación supeditada do acusado e condenado ante devandita sentenza, que data de maio do 2017, agora ratificada.
A parte recorrente, engadiu, alegou que os "feitos axuizados constitúen un delito de asasinato e non de lesións; despréndese a existencia do ánimo de causar a morte que fai posible a cualificación xurídica do feito como constitutivo do asasinato". Por contra, o tribunal determinou que a recorrente se desvía do ámbito de apelación ao pretender que a Sala dimita do seu labor de control da aplicación do Dereito".
Ao mesmo tempo, considerou que se lle insta a que non "parta necesariamente dos feitos declarados e non probados polo xurado".
Neste sentido, aludiu a que queda "desestimado por riba calquera indicio de erro na valoración da proba" e que o xurado "non considerou como probado, por unanimidade", que o home, "cunha navalla aberta na súa man dereita", acometese con ela "de xeito intencionado e con propósito de acabar" coa vida do outro home.
O maxistrado presidente observou que non "consta que acusado e vítima estivesen previamente postos a mal". De feito, sostivo que as gravacións achegadas non ratifican "conversación ou contacto previo".
