miércoles. 19.02.2020 |
El tiempo
miércoles. 19.02.2020
El tiempo

Dan a razón aos Franco nas estatuas do Mestre Mateo reclamadas por Santiago

Esculturas de Abraham e Isaac. EP
Esculturas de Abraham e Isaac. EP
Martiño Noriega critica que se "cambia a argumentación" para dicir que "non está demostrado" que sexan as mesmas pezas 
 

A Audiencia Provincial de Madrid deu a razón —tal e como fixo o xulgado número 41 de Madrid en primeira instancia— aos herdeiros do ditador Francisco Franco sobre as estatuas obra do Mestre Mateo, Isaac e Abraham, que se atopan na súa posesión e que reclama o Concello de Santiago de Compostela. 

En declaracións a Europa Press, o exalcalde de Santiago Martiño Noriega explicou que a Audiencia "cambia de argumentación" para rexeitar o recurso, dado que en primeira instancia a xuíza sinalaba que nou quedaba probada a posesión das estatuas por parte do Concello, pero agora para a Audiencia "non está demostrado" que sexan as mesmas pezas en propiedade do Franco. 

O anterior goberno local deCompostela Aberta impulsou este proceso. Agora o novo executivo santiagués socialista deberá decidir se recorre ao Tribunal Supremo. 

Noriega remarca que a propia Xunta de Galicia acreditou "perfectamente" durante o proceso co informe de declaración de Ben de Interese Cultural (BIC) que se trata das mesmas estatuas, polo que mostra a súa sorpresa de que a desestimación se basee nese argumento. Ademais, apoia esgotar a vía do Supremo. 

No documento de venda existe unha reserva "para evitar que desaparezan do concello" e presérvese a súa propiedade "pública, dos veciños de Santiago"

Pola súa banda, en declaracións á Cadena SER, o actual rexedor, Xosé Sánchez Bugallo, avanzou que se analizará a sentenza o día 26 para ver se cabe presentar un recurso "con posibilidades" ante o Supremo.

HISTORIA. A demanda do Concello de Santiago viuse apoiada, no seu día, coa localización no arquivo da Universidade de Santiago do expediente de adquisición das pezas, así como da propia escritura notarial, facendo constar todas as características das estatuas, da titularidade municipal. 

Segundo estes documentos, tras a súa retirada da Catedral, as esculturas pasaron a mans do Conde de Ximonde no século XVIII, un nobre que as vendeu ao Concello de Santiago por 60.000 pesetas en 1948. No documento de venda existe unha reserva "para evitar que desaparezan do concello" —cunha multa no caso de que así sexa— e presérvese a súa propiedade "pública, dos veciños de Santiago", sen posibilidade de venda ou cesión. 

Por iso, o Concello de Santiago decidiu proceder contra os herdeiros do Franco —María del Carmen, Jaime Felipe, María Aránzazu, José Cristóbal, María del Mar e María de la O Martínez-Bordiu Franco— e contra a mercantil Pristina SL. 

Dan a razón aos Franco nas estatuas do Mestre Mateo reclamadas por...
Comentarios