miércoles. 22.01.2020 |
El tiempo
miércoles. 22.01.2020
El tiempo

A dirección de En Marea resta importancia á non asistencia dos 'alcaldes do cambio' ao plenario

Martiño Noriega, Xulio Ferreiro e Jorge Suárez. CABALAR (EFE)
Martiño Noriega, Xulio Ferreiro e Jorge Suárez. CABALAR (EFE)

A viceportavoz da formación, Ana Seijas, defende que é "un espazo político de participación" individual polo que "non hai pesos preferentes sobre outros"

A viceportavoz de En Marea, Ana Seijas, e o coordinador, Gonzalo Rodríguez, restaron importancia á ausencia dos denominados 'alcaldes do cambio' (A Coruña, Santiago e Ferrol) ao plenario que a formación celebra este sábado en Santiago co obxectivo de perfilar a concorrencia ás eleccións municipais de 2019.

Os rexedores de Santiago, A Coruña e Ferrol; Martiño Noriega, Xulio Ferreiro e Jorge Suárez, respectivamente, anunciaron que non participarán no plenario, o máximo órgano de decisión de En Marea, evidenciando o distanciamento coa dirección da organización, a pesar de que foron eles mesmos quen impulsaron o seu nacemento no verán de 2016.

Os representantes da coordinadora restaron importancia á súa ausencia, xa que "este é un partido de adscrición individual, entón partindo dese punto haberá persoas que veñan e persoas que non veñan", sinalou Rodríguez a respostas da prensa.

Remarcou que a proposta de En Marea sempre é traballar en común desde a "máxima autonomía" das candidaturas locais, aínda que este sábado ofrecerán aos movementos municipais os recursos materiais, loxísticos, xurídicos e de contidos dos que dispón o partido instrumental. Todo iso con "respecto, diálogo e colaboración", sostivo.

De igual forma, Seijas reiterou que En Marea é "un espazo político de participación" individual polo que "non hai pesos preferentes sobre outros", polo que a ausencia dos alcaldes sería como calquera outra. Lembrou que todas as persoas inscritas están chamadas a participar, tamén os alcaldes.

"Creo que non é unha cuestión de que teña máis valor a participación duns que doutros, aínda que que quede claro que estariamos encantados de que eles, outros alcaldes e concelleiros fixesen as súas achegas e axuden a construír", apostilou respecto diso.

Sobre o plenario, Ana Seijas incidiu en que se abordarán cuestións políticas e orgánicas, pero tendo a preparación das eleccións de 2019 como "tema central neste plenario".

Na sesión de tarde, abordarase o texto redactado pola dirección e que se basea nunha "tese que foi participada" os varios encontros municipalistas celebrados no mes de febreiro, polo que ao seu xuízo "xa é unha tese que vén participada por toda organización".

Con todo, o texto enfrontarase a unha emenda de substitución redactada por un grupo de inscritos de Compostela Aberta, entre os que destacan concelleiros e o xefe de gabinete da Alcaldía, na que consideran que aínda que é "necesario chegar a un acordo nacional" que permita unha "maior unidade", todos os acordos débense tomar con "a total autonomía de cada unha das partes dentro do seu ámbito".  Neste sentido refírense a candidaturas, eleccións primarias, código ético ou programas electorais.

A dirección de En Marea resta importancia á non asistencia dos...
Comentarios