A Garda Civil investiga un veciño de Neda como presunto autor dun delito de detención ilegal, por reter durante dúas horas contra a súa vontade á irmá da muller coa que convive.
Segundo informou a Garda Civil, os axentes acudiron á vivenda situada na estrada de Roxal-Maciñeira, no termo municipal de Neda.
A vítima foi ao domicilio da súa irmá, que reside co presunto autor no baixo da súa vivenda. A súa intención era resolver un problema entre ambas por unha construción realizada.
Pero cando estaba no interior da casa, o home pechou a porta con chave e retívoa contra a súa vontade.
O individuo depuxo a súa actitude unha vez que chegou a patrulla da Garda Civil á que el mesmo chamara minutos antes. As dilixencias realizadas foron postas a disposición do Xulgado de Garda de Ferrol.
