O número de falecidos que deixa ata agora a pandemia de coronavirus en Galicia elevouse este domingo a 1.146 tras morrer outras nove persoas diagnosticadas de covid-19, dúas delas usuarias de residencias de maiores.
En concreto, segundo informa a Consellería de Sanidade, catro das novas vítimas estaban ingresadas no Complexo Hospitalario Universitario da Coruña (Chuac). Trátase de mulleres de 81, 83, 85 e 86 anos, respectivamente.
Tamén o Complexo Hospitalario Universitario de Santiago notificou este domingo a morte de dous homes, de 94 e 74 anos, diagnosticados de coronavirus. Xunto a estes, outro varón de 81 anos faleceu no Complexo Hospitalario de Pontevedra.
Ademais, no hospital comarcal do Barco de Valdeorras perdeu a vida unha muller de 91 anos procedente da residencia de Viana do Bolo, mentres que no Complexo Hospitalario Universitario de Vigo (Chuvi) morreu unha usuaria do CRAPD Vigo II, tamén de 91 anos.
