A multinacional siderúrxica Alcoa, o comité de empresa e o Ministerio de Industria seguirán discutindo o vindeiro luns a oferta presentada polo fondo suízo Parter para as plantas en Avilés (Asturias) e A Coruña (Galicia), tras aceptar todas as partes unha prórroga de oito días para negociar.
Os representantes dos traballadores negáronse "en rotundo" a asinar un escrito de conformidade co proceso e chegaron a abandonar a mesa "nalgún momento"
Nun comunicado emitido na madrugada do venres ao sábado, o comité de empresa apuntou que foi convocado ás 11.00 horas do luns, tras unha xornada na que os representantes dos traballadores se negaron "en rotundo" a asinar un escrito de conformidade co proceso e na que chegaron a abandonar a mesa "nalgún momento".
O comité de empresa emitiu o comunicado tras unha reunión entre a multinacional e os sindicatos que comezou á primeira hora da tarde do venres nun hotel madrileño para tratar a oferta presentada polo fondo suízo e cuestións laborais ás portas de que este próximo 30 de xuños se esgotase o prazo que a compañía se marcou.
Á reunión uníronse varios altos cargos do Ministerio de Industria, que solicitou a Alcoa unha prórroga dun máximo de oito días para comprobar se o investidor cumpre as peticións esixidas pola multinacional. Esta petición, segundo o comité, foi apoiada por todas as partes.
Segundo avanzou na tarde deste venres o presidente do comité de empresa, José Manuel Gómez de Uz, a dirección de Alcoa trasladoulles durante o encontro que Parter Capital non cumpre coas garantías financeiras requiridas para a compra das súas plantas de Avilés (Asturias) e A Coruña.
Segundo fontes coñecedoras da situación, ao comezo da reunión Alcoa trasladou aos sindicatos que as garantías financeiras que presentara pola mañá Parter non eran o suficientemente líquidas como pedía a multinacional alumineira.
A oferta do fondo de investimento suízo Parter Capital foi a única que aceptou a multinacional estadounidense.
Parter garantira 250 traballadores en cada unha das fábricas -fronte aos 317 con que conta a planta avilesina e os 369 da coruñesa-, cantidade que podería incrementarse no caso de que se arrinquen as series de electrólises.
No entanto, con posterioridade, o grupo alemán Quantum Capital Partners comunicou publicamente a presentación de dous proxectos industriais, autónomos entre si, para as plantas de Alcoa na Coruña e Avilés que garanten o 100 % dos postos de traballo nas mesmas condicións e por un mínimo de 2 anos.
Ademais, o grupo alemán defendeu que para ningún dos dous casos solicitara axuda pública algunha e que contaba con garantías financeiras "máis que suficientes" grazas ao soporte de entidades financeiras internacionais "de recoñecido prestixio e do seu propio grupo de compañías".
