jueves. 21.11.2019 |
El tiempo
jueves. 21.11.2019
El tiempo

Pontón acusa o PP de ser unha "auténtica fábrica" de cambio climático

Pontón reuniuse en Poio con activistas ambientais e responsables das escolas asociadas á Unesco. GONZALO GARCÍA
Pontón reuniuse en Poio con activistas ambientais e responsables das escolas asociadas á Unesco. GONZALO GARCÍA
A líder do BNG insta a actuar de forma local para limitar os efectos dun modelo económico "depredador" co medio ambiente

A portavoz nacional do BNG, Ana Pontón, acusou este mércores ao Partido Popular de impulsar á fronte da Xunta de Galicia políticas ambientais que son unha "auténtica fábrica" de cambio climático. Durante un encontro en Poio con activistas ambientais e con responsables das escolas asociadas á Unesco, reclamou un cambio de paradigma económico, ecolóxico e de consumo para frear as consecuencias que a situación de urxencia climática está a provocar no planeta.

A dirixente nacionalista apelou ao voto dos mozos que non queren que Galicia "siga a senda" que marcan "altofalantes do negacionismo" como Trump, Bolsonaro ou Salvini que, en España, convertéronse en referentes para a extrema dereita "coa que pacta o PP". A este respecto, Pontón acusou os populares de estar "empeñados" en manter a Ence na ría de Pontevedra, en apostar por un modelo forestal que "enche os montes de eucalipto" ou por unha "deficiente" ordenación do territorio que provoca o abandono do rural.

Ana Pontón, que estivo acompañada pola candidata do BNG ao Congreso por Pontevedra, Carme da Silva, sinalou que ante o "reto global" que supón facer fronte á urxencia climática "hai que actuar de forma local" para limitar os efectos dun modelo económico "depredador" co medio ambiente.

A portavoz nacional do BNG avanzou que, entre outras cuestións, o seu partido seguirá "dando a cara" para que a fábrica de Ence salga da ría de Pontevedra e proporá un cambio no modelo forestal que aposte pola biodiversidade e que declare ao eucalipto especie invasora, limitando o seu cultivo e plantación.

Pontón incluíu nas liñas de traballo do BNG o saneamento integral das rías, a posta en marcha dun tren "do século XXI" que unha todas as cidades de Galicia ou o impulso dunha economía circular que sitúe á compostaxe no "centro" da xestión dos residuos.

Os nacionalistas tamén prometer defender no Congreso prohibir por lei as "portas giratorias" para evitar que as maiores empresas contaminantes, como as eléctricas, "senten no consello de ministros" a través de excargos políticos que actúan como "lobistas de luxo" en favor dos seus intereses. "Ence é un exemplo de libro desta práctica que hai que erradicar", sinalou Pontón.

Pontón acusa o PP de ser unha "auténtica fábrica" de cambio climático
Comentarios