Máis de 360 toneladas de pataca afectadas pola couza guatemalteca foron destruídas en Galicia, aínda que a praga non foi erradicada, informou este venres a directora xeral de Agricultura da Xunta, Belén do Campo, que pediu colaboración para tratar de frear a expansión. Na súa intervención ante unha comisión do Parlamento de Galicia, Do Campo explicou que hai 33 municipios afectados por ese insecto que probablemente foi introducido en 2015 en Galicia nun barco desde as illas Canarias, onde a praga persiste desde 1999.
Precisou que a Xunta levou a cabo a destrución de colleitas de pataca, principalmente en leiras para consumo propio, operacións de fumigación e instalación de trampas, ademais da prohibición de plantar en determinadas zonas e da instalación de quilómetros de redes para previr que poidan afectar ás tres principais comarcas produtoras: Limia, Bergantiños e Coristanco.
Con todo, a representante da Xunta recoñeceu que aínda hai persoas que non respectan a prohibición de plantar naquelas zonas susceptibles de proliferación e pediu colaboración aos deputados e ao conxunto do sector agrario para axuntar esforzos co fin de controlar ao insecto devorador do tubérculo e dunha gran capacidade reprodutora en larvas.
Destacou que inicialmente o primeiro foco situouse nos municipios de Ferrol, Narón e Neda, pero posteriormente estendeuse a outros puntos da xeografía galega, o último deles en Muxía en marzo pasado. Engadiu que a pataca afectada é recollida en camións con compartimentos estancos e trasladada a unha planta en Cerceda para un un proceso de triturado, esterilización e incineración.
Do Campo subliñou que a Xunta indemniza aos produtores afectados e precisou que xa pagou 186.000 euros a 1.255 propietarios que solicitaron axudas. Así mesmo, apuntou que as autoridades levan a cabo controis en plantacións, en lugares de almacenamento, en puntos de venda e en vehículos de transporte, para tratar de controlar a praga, e abriron 17 expedientes de sanción.
Do Campo asegurou que "as cousas non se están facendo tan mal" na loita contra esa praga, pero "temos que seguir controlando e vixiando onde non se pode plantar e séguense plantando" polo que "quero pedir a colaboración de todos para loitar xuntos", dixo aos deputados da Cámara galega, e expresou a súa preocupación de que a couza foi invadir as comarcas produtoras de pataca.
O deputado do PPdeG Carlos Gómez destacou que Galicia produce 450.000 toneladas de pataca anuais e avogou por evitar que a praga desemboque nunha situación de crise, opinou que "Canarias é o modelo do fracaso" na loita contra esa praga, que aínda corre o risco de estenderse e afirmou que a Xunta actuou con "celeridade", por exemplo, no recente caso de Muxía. Con todo, os partidos da oposición criticaron a lentitude inicial en que consideraron que actuou a Xunta ante a aparición da couza e a falta de efectividade dalgunhas medidas.
O deputado do PSdeG José Manuel Pérez Seco reprochou á Xunta que "tardou en reaccionar na xestión" da praga e insistiu en reclamar unha explicación sobre as razóns polas que se detectou en zonas de ata cen quilómetros de distancia do punto inicial, ademais de terse propagado a máis dunha trintena de municipios.
Tanto a deputada de En Marea Paula Quinteiro como o do BNG Xosé Luís Rivas coincidiron en cuestionar tamén a lentitude inicial e a falta de efectividade das medidas, e en reclamar unha mellor dotación de persoal nas denominadas "oficinas agrarias", ademais doutros reproches.
Rivas opinou que se hai unha proliferación de persoas que "plantan de xeito deportivo, por dicilo de xeito irónico", esa situación obedece a que hai unha "agricultura non profesional" debido ás políticas que levaron a "desmantelar" a produtividade no ámbito rural, deixando unha "vulnerabilidade tremenda".
Nese sentido, reclamou "medidas políticas" para o desenvolvemento do ámbito rural, "non só para a praga da pataca, senón para o agrario", dixo, e invitou a incrementar a información a cultivadores de pataca, por exemplo a través da canle autonómica TVG onde a Xunta "ten man", sinalou.
