O presidente da Xunta, Alberto Núñez Feijóo, confirmou este domingo que a primeira decisión que adoptará ao recuperar as competencias no marco da terceira e última etapa da desescalada será permitir "por fin, o libre tránsito de toda Galicia", pero insistiu na necesidade de contar con "certezas" para poder pilotar o camiño cara á nova normalidade.
"Queremos executar as nosas competencias pero queremos facelo con certezas, porque España aínda está en situación de alarma ata o 21 de xuño", remarcou Núñez Feijóo en rolda de prensa tras participar nunha nova reunión co presidente, Pedro Sánchez, e o resto de mandatarios autonómicos.
Ao asumir esta nova responsabilidade que permite a mobilidade total polo territorio galego tamén se asume o "maior risco desde o inicio da pandemia" polo que Feijóo, tras facer este apuntamento, instou aos cidadáns da comunidade a "redobrar a responsabilidade e as cautelas" para seguir "cumprindo as normas de prevención sen relaxación de ningún tipo".
O presidente galego esixiu "claridade" por parte do Goberno para que quede "meridianamente claro" que competencia exercerá cada comunidade porque, ao seu xuízo, "entramos no estado de alarma con certa confusión, pero debemos saír con certezas e seguridade".
Apuntou que ante a falta de concreción sobre o modelo para saír do estado de alarma, aínda non decidiu se solicitará que Galicia abandone a situación de excepcionalidade antes do 21 de xuño e tampouco o fará ata que se lle aclare "exactamente" cales serán as súas competencias ou a mobilidade que se permitirá respecto das comunidades que aínda sigan baixo o mando do Goberno central.
REDUCIR O IVE. Ademais, aproveitou o marco da décimo terceira reunión mantida con Sánchez para solicitar novas medidas para a reactivación económica na que cre que o turismo debe xogar un papel importante. Por iso, considera que sería positivo rebaixar o Ive no sector para paliar as consecuencias da crise.
"Expuxen unha baixada do Ive para o ano 2020 e durante todo o ano 2021 para os servizos de hostalería, balnearios e restauración", avanzou o presidente autonómico que cre que esta decisión non suporía unha baixada na recadación fiscal senón "ao contrario" xa que permitiría recadar máis ao favorecer un incremento da actividade turística.
ABRIR AEROPORTOS. Tamén neste ámbito solicitou que se permita reabrir o tráfico internacional a por os menos un dos aeroportos cos que conta Galicia tal e como se lle permitiu a outros aeródromos cun nivel similar de tráfico.
Con todo, para a mobilidade aérea o presidente galego avogou por establecer a nivel europeo un sistema de control que acredite a situación epidemiolóxica do viaxeiro. A proposta do presidente galego sería un "pasaporte Covid" que así o indicase aínda que se non fose posible tamén consideraría oportuno realizar "test de dobre banda antes de embarcar nun avión".
A pesar da súa proposta, remarcou que o control dos aeroportos é unha "competencia exclusiva" do Executivo estatal.
Sobre as novas relaxacións das prohibicións en vigor, o presidente autonómico pediu tamén que se aclaren "dúbidas" sobre os eventos festivos que os concellos poderán celebrar. Tamén avanzou que esta mesma semana, o seu Goberno abordará a posible autorización da apertura dos negocios de lecer nocturno xa que entende debe ser unha "decisión meditada" que precisa de reflexión.
ELIMINAR A TAXA DE REPOSICIÓN EN SANIDADE. Para rematar, reclamou ao presidente Sánchez que o Goberno elimine a taxa de reposición nas ofertas públicas de emprego (OPE) do 2020 para persoal sanitario e de servizos sociais porque na actualidade "temos a xente contratada cunha temporalidade que nós non queremos".
A Xunta busca que se lle permita "sacar todas as vacantes en servizos sociais e sanidade" nunha decisión que "sería un bo broche" para agradecer a este colectivo "o que fixeron por todos" durante a urxencia sanitaria.
