O xurado declarou, por unanimidade, culpable de homicidio ao home acusado de matar ao seu curmán na Coruña, tras o xuízo celebrado na Audiencia Provincial coruñesa. Ademais, descartou concederlle o indulto e a suspensión da condena, segundo informaron a Europa Press fontes do caso.
Na última sesión do xuízo, a Fiscalía decidiu rebaixar de 12 a 10 anos e medio a pena de cárcere para o acusado, mentres que acusación particular e defensa solicitaron unha pena de 10 anos por homicidio despois de que a primeira renunciase a pedir unha condena por asasinato.
No que si están de acordo as partes é en pedir para o procesado, quen o primeiro día recoñeceu a súa culpabilidade, a prohibición de achegamento e comunicación coa muller e nai da vítima, respectivamente, durante un período de 20 anos.
Os feitos producíronse durante a madrugada do 10 de novembro de 2017 na Coruña tras unha discusión co agresor. Na última sesión do xuízo, o forense confirmou que a vítima presentaba tres puñaladas, unha delas, no hemitórax, con resultado "letal".
