Merkel, investida para a súa cuarta lexislatura consecutiva

Angela Merkel foi investida este mércores chanceler de Alemaña para un cuarto mandato apoiada de novo nunha gran coalición entre o seu bloque conservador e os socialdemócratas, co que se puxo fin a un longo período de interinidade descoñecido na principal potencia europea.

Cumprindo a tradición, a súa primeira viaxe ao estranxeiro, este venres, terá como destino París, onde se reunirá co presidente francés, Emmanuel Macron, para intentar tamén relanzar o proxecto europeo.

Case seis meses despois das eleccións xerais do 24 de setembro e tras unhas complexas negociacións para lograr un pacto de Goberno en Alemaña, Merkel, de 63 anos e decana xa entre os líderes europeos, recibiu o apoio da maioría absoluta do Bundestag (cámara baixa) na sesión de investidura.

Das 692 papeletas introducidas nas urnas situadas no centro do hemiciclo, 364 avalaron a súa reelección, mentres que 315 deputados votaron en contra, nove abstivéronse e catro emitiron un voto nulo.

Houbo así 35 deputados da gran coalición que non votaron a súa candidatura, pero a fuga de votos non é inusual nas sesións de investidura.

"Asumo a elección", manifestou Merkel de forma solemne ante o pleno do Bundestag despois de que o presidente da cámara, Wolfgang Schäuble, revelase o escrutinio da votación.

Tras a cerimonia de nomeamento no Palacio de Bellevue, sede da Presidencia alemá, a chanceler regresou ao hemiciclo para xurar o cargo antes de que o fixesen os seus quince ministros: seis da súa Unión Cristianodemócrata (CDU), tres da súa irmandada Unión Socialcristiana de Baviera (CSU) e seis do Partido Socialdemócrata (SPD), que encabezarán entre outros Exteriores e Finanzas.

UN CAMIÑO DIFÍCIL. O camiño cara ao cuarto mandato de Merkel non foi sinxelo, despois de que o CDU gañase claramente as eleccións de setembro, cun 33 %, pero con case dous millóns e medio de votos menos.

O SPD, co que gobernou na súa primeira lexislatura (2005-2009) e na terceira (2013-2017), caeu ao seu mínimo histórico (20,5 % dos votos) e o ultradereitista Alternativa para Alemaña (AfD) irrompeu no Parlamento alemán como terceira forza, cun 12,6 %.

A fragmentación política complicou o obxectivo de Merkel de formar un Goberno estable e, tras cinco semanas de negociacións infrutuosas con liberais e verdes, viuse obrigada a volver mirar aos socialdemócratas, que finalmente se abriron ao diálogo, aínda que entre fortes tensións internas.

O proceso acabou coa carreira do que foi cabeza de lista e líder do SPD, Martin Schulz, pero a chanceler superou todas as etapas e o pasado luns asinou formalmente o acordo de gran coalición, avalado nunha consulta interna polo case medio millón de militantes socialdemócratas.