Detido un home por encañonar un operario da ITV en Narón

Sacou unha escopeta de caza tras non superar a revisión do seu vehículo por segunda vez

 

Un veciño de Moeche de 75 anos foi detido por encañonar este martes cunha escopeta de caza a un operario da ITV do polígono industrial das Gándaras, en Narón, ao non superar a revisión do seu vehículo. 

Axentes da Policía Nacional pertencentes á comisaría de Ferrol-Narón detiveron no mediodía deste martes, sobre as 13,45 horas, a este home, que ameazou un empregado da empresa Supervisión e Control (SyC), concesionaria do servizo de ITV en Galicia. 

Segundo trasladou unha testemuña do suceso a Europa Press, o incidente produciuse despois de que o vehículo do septuaxenario, un todoterreo, fose rexeitado por segunda vez na inspección periódica, o que motivou que o home ameazase nun primeiro momento ao empregado con "enviarlle uns xitanos para arranxar contas". Acto seguido, sacou do interior do vehículo unha escopeta de caza, cargada cun cartucho, á vez que esgrimía na outra man outro cartucho. 

A reacción do operario foi en todo momento tratar de acougar ao suposto agresor, trasladándolle que ía reclamar a presenza do encargado para "tratar de solucionar o asunto". 

Foi entón cando se puxo o incidente en coñecemento da Policía Nacional e Policía Local de Narón. Dotacións policiais, con pistola en man, detiveron ao autor do incidente, que non ofreceu oposición. 

Segundo os datos aos que tivo acceso Europa Press, o detido ten permiso de armas e está domiciliado na parroquia de San Jorge de Moeche, nas proximidades do castelo medieval situado neste municipio da comarca de Ferrol.