José Antonio, un dos 18 finalistas a participar na nova edición de Operación Triunfo, que arrinca este mércores na 1, converteuse este venres en historia do soado concurso de talentos de televisión ao converterse no primeiro que declina seguir no proceso de selección nunha fase tan avanzada. Segundo explicou el mesmo a través dun vídeo emitido durante a rolda de prensa deste venres en Barcelona, retransmitida pola web de RTVE, a razón tomouna o novo aspirante para poder seguir coa súa carreira como médico: "Custoume moito sacar a praza e borrar todo iso de golpe é moi duro".
#LlegaOT2018 Por primera vez en la historia de @OT_Oficial, un concursante ha renunciado a entrar en la Academia. Se llama José Antonio y ha decidido seguir con su carrera de Medicina https://t.co/lfoc70f3JU pic.twitter.com/CKX5GnrEZZ
— TVE (@tve_tve) 14 de setembro de 2018
"Estaba disposto a cambiar o bisturí polo micrófono. Perdemos un gran músico pero España gañou un gran cirurxián", engadiu o presentador, Roberto Leal.
Uns 10.000 aspirantes presentáronse este ano ás probas do concurso, tras o enorme éxito que volveu experimentar a anterior edición, cunha gala de clausura na que resultou gañadora Amaia Romero e que tivo unha cota de pantalla do 30,8 por cento.
José Antonio debía ser un dos 18 finalistas do longo proceso de selección que o mércores se enfrontarán á Gala 0, na que será o público cos seus votos o que determine quen son os 16 concursantes que definitivamente entran á Academia para iniciar a súa formación e aspirar á vitoria. Dáse a circunstancia de que, tal e como se revelou este venres, a diferenza do que sucedeu na edición anterior, calquera destes 16 concursantes poderá optar a representar a España no Festival de Eurovisión 2019.
"(José Antonio) leva toda a vida estudando para ser médico e deixar iso por entrar na gala 0, na que tampouco tes garantido o pase, era arriscado", explicaron Noemí Galera, responsable do casting e directora da Academia, e Tinet Rubira, director de OT.
Leal comunicou que o nome do seu substituto coñecerase na citada Gala 0.