A ministra de Política Territorial e Función Pública, Meritxell Batet, abriu a porta a modificar, sempre que haxa consenso, leis orgánicas do Estado para poder recuperar artigos do Estatut de Cataluña que foron no seu día tombados polo Tribunal Constitucional: "Aí hai marxe para traballar".
Nunha entrevista en RNE recollida por Europa Press, Batet explicou que houbo artigos do Estatut orixinal que foron declarados inconstitucionais "non polo contido, senón porque o Estatuto non era a norma adecuada para regular a materia en si" e correspondía facelo no marco de leis "orgánicas como a do Poder Xudicial".
"O TC dicía que se había que introducir algunha modificación, non tiña que regularse no Estatut, senón na lei orgánica que correspondese. Aí hai marxe para traballar", sinalou.
Con todo, recoñece que "afecta a leis orgánicas" e este tipo de modificacións hai que facelas "desde o punto de vista do consenso e de acordos moi amplos". "Non son leis que se poidan ir modificando ao albur dunha maioría conxuntural, é bo que respondan a un sentimento maioritario e transversal", apostilou.
PODEMOS CELEBRA O DIÁLOGO. Pola súa banda, a portavoz de Unidos Podemos no Congreso, Irene Montero, asegura ver "con moi bos ollos" a disposición ao diálogo que o Goberno de Pedro Sánchez e Batet mostran en relación con Cataluña.
Por iso, e fronte ás palabras do ministro de Exteriores, Josep Borrell, alertando dun enfrontamento civil en Cataluña, que tacha dun "pouco alarmistas e esaxeradas", Montero avoga por avanzar "na senda do diálogo", e non tanto para recuperar artigos concretos do Estatut, senón para crear "un `marco de confianza". "Ésa é a senda", remachou.
Mentres, a alcaldesa de Barcelona, Ada Colau, asegurou que Sánchez ten na súa man o achegamento a prisións de Cataluña dos líderes políticos que están no cárcere pola súa actuación no procés, e debe impulsalo canto antes para favorecer o diálogo.
A OPOSICIÓN DE RIVERA. As críticas máis duras á negociaciónc co Govern chegan desde PP e Cidadáns. Precisamente o presidente da formación laranxa, Albert Rivera, asegurou este luns que a líder do partido e da oposición en Cataluña, Inés Arrimadas, "está a desexar reunirse co presidente da Generalitat", pero non cunha persoa que é "racista" e que di "que en España hai exiliados e presos políticos". "Con señores que din que o meu país é unha ditadura non podo falar nada", apostilou.
