O avance do cambio climático, con secas e vagas de calor máis extremas e prolongadas, representa unha ameaza para as plantacións de cebada, o que podería afectar á produción de cervexa e ao seu prezo, segundo un estudo que publica este luns a revista Nature.
A investigación, liderada pola Universidade de California Irvine (EE UU) e a Universidade de East Anglia (Reino Unido), suxire que a caída no rendemento do cultivo dese cereal, particularmente sensible ás condicións extremas, encarecería, ante a súa escaseza, a bebida alcohólica máis consumida no planeta.
Aínda que os científicos constataron con anterioridade en cinco modelos climáticos da Terra que a frecuencia e severidade das secas e altas temperaturas aumentarán substancialmente, nunca ata agora avaliaran a vulnerabilidade da cervexa neses escenarios extremos.
En consecuencia, os autores deste estudo, no que tamén participaron a Universidade de Pequín (China) e o Centro Internacional de Mellora de Millo e Trigo de México, examinaron o comportamento futuro dos cultivos de cebada e o seu efecto sobre a produción e subministración da cervexa.
Descubriron que a caída media na produción do cereal, principal ingrediente da bebida, oscilará entre o 3 e o 7%, dependendo do grao de inclemencia do clima previsto no seu modelo.
A diminución no rendemento dos cultivos de cebada provocará reducións proporcionalmente maiores nas cantidades de cereal que se poderá destinar á elaboración de cervexa, pois a comunidade internacional daría prioridade a produtos máis esenciais para a poboación, apuntan os expertos.
Neste escenario, caería o consumo de cervexa e, ao mesmo tempo, subiría o seu prezo, en maior ou menor relación debido a factores culturais ou económicos de cada rexión ou país.
Así, sinalan, un dos países máis afectado sería Irlanda, onde a bebida nacional podería encarecerse entre un 43 e un 338% a finais deste século, de acordo co modelo de cambio climático máis severo.
