O presidente do PP, Pablo Casado, e os presidentes das comunidades autónomas do PP coincidiron este sábado en rexeitar a posibilidade de prorrogar o estado de alarma "ao redor dun mes", que expuxo o presidente do Goberno, Pedro Sánchez.
Casado e os presidentes autonómicos analizaron a proposta de Sánchez, que vai "en contra do seu propio compromiso e do recoñecemento do seu Goberno de que hai unha alternativa á excepcionalidade constitucional na lexislación en vigor" para manter as medidas de protección da saúde "con transparencia e rigor", informaron fontes do PP.
Os presidentes autonómicos de Andalucía, Juan Manuel Moreno; Castela e León, Alfonso Fernández Mañueco; Galicia, Alberto Núñez Feijóo; Madrid, Isabel Díaz Ayuso; Rexión de Murcia, Fernando López Miras; e o da cidade autónoma de Ceuta, Juan Vivas, apoiaron "o plan B, Activemos España", para a desescalada xurídica, económica e sanitaria fronte á crise da covid-19 presentado o pasado martes polo PP.
Segundo o partido, trátase dun "plan alternativo" ao do Goberno e consiste nun "programa para protexer a saúde dos españois e tamén para evitar a destrución económica con medidas de axuda a traballadores, pemes e autónomos".
O plan do PP inclúe protexer á poboación vulnerable de maiores e enfermos, illando aos contaxiados e os seus contactos con test masivos e aplicacións informáticas, e activando ao resto con máscaras obrigatorias, resumiron as mesmas fontes.
