Cataluña reducirá a corentena de catorce a dez días de illamento por covid-19, segundo anunciou este martes o secretario de Saúde Pública, Josep Maria Argimon. Esta medida implantarase en todo o país, informa a Cadena Ser, tras o acordo que previsiblemente asinarán este martes comunidades e Goberno.
Ademais, o Consello de Ministros aprobou este martes a norma que rexerá o teletraballo en España tras o acordo logrado o luns con patronal e sindicatos.
Segundo sinalou a portavoz do Goberno, María Jesús Montero, a norma está á "vangarda" de regulamentos sobre este tema e é un exemplo máis da importancia do diálogo social.
A norma establece a necesidade de asinar un acordo co empregado que vaia traballar a distancia máis do 30% da xornada semanal durante un período de tres meses e a obrigación do empresario de pagar os gastos nos que poida incorrer.
O traballo a distancia será voluntario e reversible tanto para a persoa traballadora como para a empresa, e non suporá un menoscabo nos dereitos de quen o realicen respecto ao resto de traballadores en condicións como a retribución, a estabilidade no emprego, o tempo de traballo, a formación e a promoción profesional.
En canto aos prazos, as empresas deberán recoller a lei nun convenio ou acordo colectivo nun prazo dun ano desde a súa publicación no BOE ou nun máximo de tres anos, en caso de así acordalo cos representantes dos traballadores.
