A Policía Nacional detivo no aeroporto de Madrid-Barajas o etarra Luis Miguel Ipiña Doña, coñecido como Torero ou Tontxu, sobre o que pesaba unha orde de detención desde 2015, cando trataba de entrar en España procedente de Bogotá cun pasaporte de México.
Ipiña Doña, responsable de importantes accións terroristas, atentados con vítimas mortais e colocación de explosivos con numerosos feridos, foi arrestado polos axentes de Policía Nacional cando descendía dun avión procedente de Bogotá, segundo informou o Ministerio do Interior. O detido, que ten 67 anos, residía neste país desde 1980 e nacionalizouse mexicano en 1987.
Alí foi detido e ingresou en prisión en maio de 2011 acusado de estar en posesión dun arma de fogo de uso exclusivo do Exército e vínculos con Eta cando viviu en España. Precisamente, as autoridades mexicanas investigaban a Ipiña pola súa presunta vinculación con Juan Carlos Recarte Gutiérrez, outro etarra residente en México que foi detido o 29 de novembro do 2010 e extraditado a España para ser xulgado pola Audiencia Nacional.
En outubro de 2012 Ipiña saíu do cárcere despois de que un tribunal mexicano declarase nulo o rexistro do seu domicilio onde foron achados un fusil e unha pistola, xa que o entón detido non estaba presente na inspección. Axentes da Comisaría Xeral de Información da Policía en colaboración con Interpol detivérono este mércores ás oito da mañá cando ía entrar en España procedente de Colombia.
