A Policía andorrana detivo este domingo en Andorra a Martí Cots Saleta, un perigoso delincuente que se achaba fuxido e que é coñecido co sobrenome do Rambo da Cerdanya, confirmaron fontes próximas ao caso. A detención produciuse despois de que na madrugada do venres ao sábado irrompese no hotel Alp Masella, un importante complexo turístico a pé de pistas de esquí no Pirineo xerundense, e esgrimindo unha pistola e ameazando o persoal levou máis de 15.000 euros da recadación que o establecemento tiña na caixa forte.
As testemuñas recoñeceron como autor do asalto a Martí Cots, que o pasado día 7 fuxira do psiquiátrico no que estaba ingresado en Lleida, polo que os Mossos alertaran desde entón de que había risco de que puidese actuar de novo. Nestes 16 días en liberdade, os Mossos, que enviaron un requirimento de investigación con aviso de extremar as precaucións, sospeitaban que Martí Cots se movía nun todoterreo de cor azul e temían que, á parte da pistola que utilizou contase tamén cunha arma longa do calibre 22.
Martí Cots, cunha carreira delituosa de tres décadas, é especialista no roubo de vehículos, e en armas, atracos, fugas —incluso disparando contra a policía— e supervivencia no bosque. Cots, de 48 anos, escapouse en 1999 da prisión e estivo dous anos escondido e roubando algunhas entidades bancarias. Os Mossos detivérono nunha das visitas que facía á súa nai.
No momento do arresto, Cots gritou: "Avisade ao presidente dos Estados Unidos para que me indulte. Eu son Rambo". Desde entón, tamén se lle coñece como o Rambo da Cerdanya.
