Quince persoas foron detidas en Valladolid nunha operación que a Policía Nacional e a Axencia Tributaria manteñen aberta por unha suposta estafa na que, ao parecer, empregados da empresa funeraria El Salvador incineraban aos falecidos en cadaleitos máis baratos que os adquiridos polas familias.
A Delegación do Goberno en Castela e León confirmou esta operación que comezou ás 8.00 horas deste xoves, mentres que fontes do caso informaron a Efe de que as actuacións se están desenvolvendo no tanatorio que a funeraria ten en Valladolid, situado no cemiterio do Carmen onde se atopan máis dunha vintena de policías e membros da Axencia Tributaria.
Ademais, os axentes están a realizar rexistros nas dependencias que a empresa ten na céntrica rúa Angustias, na capital, así como noutra no municipio valisoletano de Santovenia.
Nas inmediacións do tanatorio El Salvador hai axentes e vehículos policiais
Tamén se produciron rexistros domiciliarios simultáneos nas vivendas onde viven algúns dos detidos, segundo informaron a Efe fontes do caso.
A investigación, que trata de determinar se os empregados da funeraria cambiaban os cadaleitos comprados polos familiares por outros de menor prezo no momento da incineración, iniciouse en 2017 aínda que a operación e os rexistros comezaron este xoves, segundo as mesmas fontes, que indicaron que existe secreto das actuacións decretado polo xulgado que investiga o caso.
Ao parecer, os empregados dedicábanse a reutilizar os cadaleitos, incinerando aos falecidos en féretros máis baratos dos elixidos polas familias.
Nas inmediacións do tanatorio El Salvador hai axentes e vehículos policiais, así como familiares de falecidos que acoden a despedir aos seus seres queridos.
A Delegación do Goberno indicou que cando conclúa esta fase da investigación convocará unha rolda de prensa e ofrecerá destalles sobre o caso, así como o número de detidos.
