O director xeral de Tráfico, Pere Navarro, propuxo este xoves unha reforma do carné para que se amplíe o número de puntos que se detraen polo uso do teléfono móbil ao volante (dos 2 actuais a 4 ou 6) e por non levar o cinto de seguridade (de 3 a 4).
Trátase dunha das propostas que Navarro expuxo na Comisión de Seguridade Viaria do Congreso, onde instou aos grupos políticos a acordar algunhas medidas para rebaixar a sinistralidade, entre elas a retirada de máis puntos por esas infraccións.
Pero, tamén, unificar a 90 quilómetros por hora a velocidade máxima en todas as estradas secundarias ou convencionais (nas con beiravía de 1,5 metros é agora de 100 km/h), que sexan obrigatorias algunhas clases presenciais sobre seguridade viaria para obter o carné de conducir e que os profesores de autoescola se formen de forma regulada na formación profesional.
Suxeriu, así mesmo, aumentar o número de radares para o control da velocidade. "Síntoo, pero é o único medio que temos", dixo Navarro antes de comparar os 7.200 aparellos deste tipo que ten o Reino Unido e os 4.000 de Francia cos 1.000 de España.
Tamén avanzou que en outubro se incorporarán 250 novos axentes á Agrupación de Tráfico da Garda Civil e en 2019 farano outros 400.
Navarro deixou en mans da Comisión de Seguridade Viaria da Cámara a toma destas decisións, pero na súa comparecencia quixo expor as liñas xerais das medidas que o seu organismo considera necesarias para mellorar a accidentalidade.
