O Goberno español ha proposto á Unión Europea que fixe un prazo temporal concreto para que o réxime de Nicolás Maduro convoque eleccións libres en Venezuela e, caso de non cumprir esta condición, recoñeza ao líder da Asemblea Nacional, Juan Guaidó, como presidente interino do país.
Así o explicou o ministro de Exteriores, Josep Borrell, na rolda de prensa posterior ao Consello de Ministros, na que sinalou que nestes momentos está reunido o comité político preparatorio do Consello de Exteriores da UE analizando esta proposta.
"España traballou moito, non imos a remolque da Unión Europea, remolcamos á Unión Europea dados os enormes lazos culturais e humanos con Venezuela", dixo Borrell.
Ademais, o ministro salientou o "liderado" e "empuxe" do presidente español, Pedro Sánchez, así como o "papel determinante" do Goberno para que a crise venezolana sexa "tomada en consideración" pola comunidade europea.
Algo no que coincide a portavoz do Executivo, Isabel Celáa, quen abundou este venres na idea de que Sánchez está "a liderar" os movementos producidos en Europa con respecto a Venezuela, recalcando que a solución pasa "pola convocatoria inmediara de eleccións libres".
Alberto Núñez Feijóo
"Non aproveitar esta oportunidade e non dicir claramente que estamos coa democracia en Venezuela é algo que España non se pode permitir"
FEIJÓO. Pola súa banda, o presidente da Xunta de Galicia, Alberto Núñez Feijóo, asegurou este venres que Guaidó comprometeuse a facer unhas eleccións libres e seguras" e advertiu de que España debe dicir "claramente" que está "coa democracia en Venezuela" ante a "fiestra de esperanza" que se abre no país.
"Paréceme que non aproveitar esta oportunidade e non dicir claramente que estamos coa democracia en Venezuela é algo que España non se pode permitir", manifestou Feijóo aos xornalistas coincidindo coa súa visita á feira de FITUR en Madrid.
O presidente de Galicia sinalou que Venezuela está a vivir nos últimos anos unha "constante e continua degradación" non só desde o punto de vista democrático e político senón tamén humanitario porque a xente "estao pasado moi mal".
"En Venezuela hai dificultades para comer, hai dificultades sanitarias, non hai medicamentos e hai moitísima xente que se está indo, pasando a fronteira e volvendo outra vez a España e Galicia. Estamos nunha situación dramática", salientou.