España volverá asistir ao festival Eurovisión Junior e participará no próximo certame que se celebra o 24 de novembro en Gliwice (Polonia), con nenos e nenas de idades comprendidas entre os 9 e os 14 anos. Así o anunciou este martes a Corporación RTVE, que destacou os "bos resultados" das catro participacións españolas, cun primeiro posto (2004), dúas segundas posicións (2003 e 2005) e un cuarto lugar (2006).
Eurovisión Junior naceu no ano 2003 e, co inicio do certame, comezou tamén a participación de España. Sergio foi ese ano o representante español, quen obtivo unha segunda posición, coa canción Desde el cielo.
María Isabel e o seu 'Antes muerta que sencilla' alzáronse coa vitoria en 2004
En 2004, María Isabel e a súa Antes muerta que sencilla alzáronse coa vitoria, mentres que Antonio José logrou un segundo posto en 2005 con Te traigo flores. En 2006, a última participación de España no concurso infantil, Dani logrou un cuarto posto co tema Te doy mi voz.
Gliwice, a cidade da rexión polaca de Silesia, albergará a XVII edición do Festival da Canción Junior 2019 organizado pola Unión Europea de Radiodifusión (UER), tras a vitoria de Roksana Wegiel en 2018. Na próxima edición participarán un máximo de 18 países.
